Berge tekur við norska landsliðinu

Christian Berge var í dag ráðinn þjálfari norska landsliðsins í handbolta og tekur hann við starfinu af Svíanum Robert Hedin.

Berge er fyrrum landsliðsmaður en þessi fertugi kappi var á mála hjá Flensburg í Þýskalandi í sjö ár. Hann hefur undanfarið verið þjálfari Elverum og heldur því starfi áfram.

Norska landsliðið sat eftir í riðlakeppninni á EM í Danmörku í vetur og hefur valdið vonbrigðum á síðustu stórmótum. Berge fær nú það verkefni að koma liðinu á HM í Katar á næsta ári.

Noregur mætir lærisveinum Patreks Jóhannessonar í tveimur umspilsleikjum um sæti á HM en þeir fara fram í júní. Ísland leikur þá gegn Bosníu í sömu undankeppni.