Skór sem vekja athygli

Uppáhaldsskórnir mínir þessa dagana eru eldrauðir og kafloðnir skór frá X18," segir Guðný María Jónsdóttir leikstjóri um uppáhaldsskóna sína.

"Ég hef átt þessa skó í tvö ár og þeir eru alveg æðislegir og rosalega flottir. Þeir hafa líka enst mér mjög vel því ég er oft í þeim, bæði hversdagslega og þegar ég fer eitthvað aðeins fínna," segir Guðný og bætir við að hún hafi fallið fyrir þessum skóm um leið og hún leit þá augum.

Loðnir skór er nú ekki eitthvað sem maður sér á hverju strái og segir Guðný að þeir veki mikla athygli. "Ég fór til dæmis til Kaupmannahafnar um daginn og þar fékk ég og skórnir mínir mikla athygli því þeir eru jú aðeins öðruvísi en venjulegir skór."

Aðspurð um skótískuna í dag segir Guðný hana vera að sínu skapi. "Skótískan í dag er alveg brillíant. Mér finnst frábærir alls konar litir og munstur og nota einmitt skó til að lífga aðeins upp á dressin mín," segir Guðný og bætir við að hún sé sérstaklega hrifin af skóm og að sá áhugi hafi aukist mjög mikið að undanförnu. "Ég vel mér samt alltaf þægilega skó, ég vil alls ekki háhælaða skó -- þeir eru ömurleg uppfinning."