Kostuðu nýju vatnsbólin í Grindavík

Bandaríkjamenn hafa veitt tólf milljónir dollara, eða um átta hundruð milljónir króna, í ýmis verkefni á Keflavíkurflugvelli og telja sig þar með hafa uppfyllt skyldur sínar. Þetta kemur fram í úttekt sem bandarísk stjórnvöld létu gera á stöðu umhverfismála á varnarsvæðunum í sumar.

Í úttektinni kemur fram að Bandaríkjamenn fjármögnuðu nýtt vatnsból fyrir rúmlega 600 milljónir króna árið 1989 þegar þremur gömlum vatnsbólum Keflvíkinga og Njarðvíkinga var lokað. Mengun hafði mælst í tveimur þeirra en hún var undir bandarískum og evrópskum stöðlum.

Mengunin var til komin vegna afísunarefna af flugvellinum í Njarðvík og frá æfingasvæði slökkviliðsins, að sögn Magnúsar H. Guðjónssonar, framkvæmdastjóra Heilbrigðiseftirlits Suðurnesja. Hann telur sérkennilegt að engar reglur banni mengun jarðvegs á Íslandi. Ákveðið var í ríkisstjórnartíð Steingríms Hermannssonar forsætisráðherra og Jóns Baldvins Hannibalssonar utanríkisráðherra að færa vatnsbólið í hraunið við Grindavík. Bandaríkjamennirnir fjármögnuðu flutninginn gegn því að firra sig frekari ábyrgð.