Ævisaga Guðmundar Finnbogasonar er komin út

Frá sál til sálar er heiti bókar sem komin er út hjá Hinu íslenska bókmenntafélagi eftir Jörgen Pind sálfræðing. Ritið fjallar um ævi og verk Guðmundar Finnbogasonar sálfræðings, en það er nýlunda að hann sé kenndur við það starfsheiti, lengst af var hann þekktur í íslensku menningarlífi sem landsbókavörður.

Færri vita að Guðmundur var frumkvöðull í íslenskri sálfræði og vann sem slíkur gríðarlega merkilegt starf, bæði með fræðistörfum sínum og sem höfundur og hugmyndasmiður fræðslulaganna sem sett voru 1907 og lögðu grunninn að skólaskyldu hér á landi.

Guðmundur var fæddur árið fyrir þjóðhátíðarárið, 1873, og lést lýðveldishátíðarárið 1944. Hann samdi verkið Den sympatiske forstaaelse sem er þekkt sem sígilt rit í norrænni sálfræði en mætti litlum skilningi landa sinni sem löngum hafa litið sálfræðina hornauga.

Í ævisögunni gerir Jörgen sérstaka grein fyrir kenningum Guðmundar um samúðarskilninginn sem telja verður hans frumlegasta framlag til íslenskra hugvísinda og landar hans hafa ekki sýnt mikinn sóma.

Bókin er 474 bls. að stærð og er ríkulega myndskreytt. Höfundurinn staðnæmist við kenningasmíði Guðmundar en rekur jafnframt margvíslega opinber afskipti hans en Guðmundur var gríðarlega áhrifamikill maður í opinberri umræðu hér á landi á sinni tíð og hafði áhrif víða, Jörgen Pind hefur unnið að riti sínu um nokkurra ára skeið og er prófessor í sálfræði við Háskóla Íslands.