Bannið þessa sjúku bók

Allt útlit er fyrir að hagsmunasamtök á Írlandi muni reyna að fá örmyndasögubók Hugleiks Dagssonar, Should You Be Laughing At This?, bannaða þar í landi en bókin þykir senda unglingum vægast sagt varasöm skilaboð.

The Irish Sun birti nýlega frétt um bókina með stríðsfyrirsögninni "Bannið þessa sjúku bók" en undir henni var rætt við Majella Ryan, talskonu barnahagsmunasamtakanna CARI, þar sem hún fullyrðir að reynt muni verða að hefta dreifingu bókarinnar í landinu.

"Þetta er bara æsifréttamennska," segir Hugleikur og kippir sér ekki upp við ofsafengin viðbrögðin á Írlandi. "Kannski hefur þetta fólk alveg rétt fyrir sér. Þetta eru afar ósmekklegar sögur og ég hef þannig séð engan rétt til að gera grín að þessum hlutum þannig að ég er ekkert hissa á því að fólk sé reitt," bætir Hugleikur við.

Majella segist ekki skilja hvað fékk Penguin til að gefa hana út á Bretlandseyjum. "Bókin er svo hræðileg að ég veit varla hvar ég á að byrja," segir hún.

"Henni er greinilega beint til unglinga og er mjög móðgandi og sendir mjög hættuleg skilaboð," segir Majella og tiltekur sjálfsmorð, morð og sifjaspell sem viðkvæma hluti sem Hugleikur skopast að.

Hugleikur neitar því ekki að þessi hörðu viðbrögð kitli sig svolítið. "Þetta er skemmtilegt að vissu leyti og það er gott að fá þennan pól í þetta.

Við Íslendingar erum svo kaldir og náum kaldhæðninni eins og skot og þó við séum undan Írum þá eru í það minnsta ekki þessir tilteknu Írar að fatta þetta," segir Hugleikur og bendir jafnframt á að hann viti fyrir víst að margir Írar séu hrifnir af sögum sínum.

Bókinni hefur verið vel tekið í Bretlandi en Penguin steig varlega til jarðar og treysti sér til að mynda ekki til að halda upprunalegum titli hennar sem var "Avoid Us" og breytti honum í spurninguna "Ættir þú að hlæja að þessu?"