Heragi í hljóðverinu í L.A.

Rokksveitin Mínus er nýkomin heim eftir að hafa tekið upp nýja plötu í Los Angeles. Þar unnu þeir með þekktum upptökustjóra.

„Þetta gekk bara vel. Þetta var mjög strangt prógram í stúdíóinu allan tímann. Við vorum í tæpar þrjár vikur að vinna í stúdíói frá morgni til kvölds," segir Frosti Logason, gítarleikari Mínuss. „Eftirvinnslan á plötunni er eftir en við erum búnir að taka upp heila breiðskífu og erum mjög sáttir við útkomuna."

Við vinnslu plötunnar nutu Mínus-menn leiðsagnar tveggja þekktra upptökustjóra, Íslendingsins Husky Huskolds og Joe Barresi sem meðal annars hefur unnið með Tool og Queens of the Stone Age

Þegar Mínus fékk frí frá upptökunum nýttu þeir félagar tækifærið vel og spiluðu á hinum þekkta tónleikastað Viper Room. Voru viðbrögð áhorfenda mjög góð en þetta var í fyrsta sinn sem sveitin spilaði í Los Angeles.

Að sögn Frosta tóku þaulvanir menn upp plötuna. „Þetta var mikil lífsreynsla og góður skóli fyrir okkur. Þetta var allt öðruvísi en við erum vanir og við lærðum mikið á þessu. Það var miklu meiri vandvirkni í öllu heldur en við erum vanir og rosalegur heragi í stúdíóinu. Það verður fróðlegt að sjá hvernig þetta kemur út."

Platan er væntanleg í vor og segir Frosti að hljómurinn sé ekki mjög frábrugðinn síðustu plötu, Halldóri Laxness, sem kom út fyrir þremur árum við frábærar undirtektir. „Þetta er þroskaðri og betri Mínus og þannig séð alveg rökrétt þróun frá því sem við höfum verið að gera," segir Frosti.

Ekki er búið að ákveða hvenær Mínus heldur næstu tónleika. „Við vorum með plan fram að þessu og erum nýbúnir að ljúka upptökunum. Við ætlum að setjast niður og slappa af yfir hátíðarnar og svo verður framhaldið ákveðið eftir áramót."