Jólatónleikar hjá Kammersveitinni

Kammersveit Reykjavíkur efnir til hefðbundinna jólatónleika sinna í Áskirkju á morgun kl. 16. Að þessu sinni verða þetta miklir fjölskyldutónleikar, því Nardeau-fjölskyldan leikur öll einleik og að auki spila þær þrjár systur Ingólfsdætur einleikinn í Jólakonsert Corellis.

Fjölskyldubönd hafa löngum þekkst í tónlistarheiminum. Menntun og þjálfun í tónlist hefur gjarnan gengið mann fram af manni í stórum systkinahópum og ekki óalgengt að tóngáfur erfist mann fram af manni. Óvenjulegt er að heil fjölskylda hafi tónlistina að ævistarfi.

Það er þó reyndin með Nardeau-fjölskylduna, þar sem synir þeirra Guðrúnar og Martials hafa báðir ákveðið að helga sig tónlistinni. Eru báðir lagðir á framabraut tónlistarinnar og leika með foreldrum sínum á sunnudagstónleikunum: Matthías hefur þegar lokið námi frá Tónlistarháskólanum í París og Jóhann, sem lauk prófi frá Tónlistarskólanum í Reykjavík á liðnu vori, heldur nú til framhaldsnáms, einnig í París. Hann er aðeins 18 ára gamall og ótrúlega efnilegur trompetleikari.

Á efnisskránni eru verk eftir Johann Wilhelm Hertel, Jacques-Christophe Naudot, Antonio Vivaldi, Johann Sebastian Bach og Antonio Corelli.