Ekkert liggur fyrir um afsögn mína

Guðni Ágústsson, varaformaður Framsóknarflokksins segir í yfirlýsingu sem hann sendi frá sér fyrir stundu að ekkert liggi fyrir um afsögn hans. Guðni segir að hann hafi á fundi með forsætisráðherra og hans nánustu samstarfsmönnum fallist á ákveðnar tillögur sem miðuðu að því að ný forysta tæki við flokknum strax í sumar.

Þar hafi m.a. verið gert ráð fyrir að þeir segðu báðir af sér, formaðurinn og varaformaðurinn. Í dag hafi hins vegar orðið ljóst að ekki yrði af því og ekki sú samstaða í flokknum sem áður var talið. "Þess vegna vil ég taka fram að ekkert liggur fyrir um afsögn mína sem varaformaður enda ekkert samkomulag miðað við þessa niðurstöðu," segir í yfirlýsingu Guðna Ágústssonar.

Yfirlýsing Guðna Ágústssonar varaformanns:

Vegna orða Halldórs Ásgrímssonar forsætisráðherra fyrr í kvöld vil ég taka eftirfarandi fram.

Ég hafði á fundi með forsætisráðherra og hans nánustu samstarfsmönnum fallist á ákveðnar tillögur sem miðuðu að því að ný forysta tæki við flokknum strax í sumar, sem alger samstaða væri um meðal miðstjórnar, landsstjórnar og þingflokks. Þá var gert ráð fyrir að við Halldór segðum báðir af okkur sem formaður og varaformaður.

Í dag, annan dag hvítasunnu, var ljóst að ekkert yrði af þessum fyrirætlunum og ekki sú samstaða í flokknum sem áður var talið.

Þess vegna vil ég taka fram að ekkert liggur fyrir um afsögn mína sem varaformaður enda ekkert samkomulag miðað við þessa niðurstöðu.

Ég vil á þessum tímamótum þakka Halldóri Ásgrímssyni langt samstarf um leið og ég virði þá ákvörðun hans að standa upp nú.

Guðni Ágústsson