Dæmdur fyrir nauðgun

Karlmaður á þrítugsaldri var í héraðsdómi í dag dæmdur í þriggja og hálfs árs fangelsi fyrir að nauðga tvítugri stúlku á göngustíg í Breiðholti í sumar.

Maðurinn, Sigurður Rafn Ágústsson, réðst á konuna, sem er liðlega tvítug á göngustíg milli Arnarbakka og Suðurfells þegar hún var á leið til vinnu sinnar á fjórða tímanum aðfaranótt fimmtudagsins 10. ágúst síðastliðinn. Dómurinn lýsir nauðguninni sem hrottafenginni en maðurinn notaði bæði hníf og logandi kveikjara til að ganga í skrokk á konunni.

Maðurinn rændi einnig af henni peningum sem hún hafði meðferðis og síma.

Göngustígurinn sem nauðgunin átti sér stað á er rétt fyrir neðan bensínstöð Selcet í Breiðholti og skoðaði lögreglan upptökur úr öryggismyndavél bensínstöðvarinnar. Á upptökunni sást maður sem svipaði til lýsingar konunnar koma tvisvar á bensínstöðina um nóttina, haft var uppi á manninum og játaði hann verknaðinn við yfirheyrslur hjá lögreglunni. Maðurinn sagðist hafa verið í mikilli amfetamínneyslu þegar árásin átti sér stað en dómurinn taldi það ekki réttlæta verknaðinn. Maðurinn hlaut þriggja ára skilorðsbundinn dóm fyrir þjófnað á síðasta ári og með árásinni rauf hann skilorðið.

Hann var dæmdur til þriggja og hálfs árs fangelsisvistar fyrir nauðgun og rán. Hann þarf jafnframt að greiða konunni tvær milljónir króna í miskabætur og 560.000 krónur í sakarkostnað.