Barist fyrir framtíð TÞM

Næstkomandi laugardag verða haldnir baráttutónleikar fyrir framtíð Tónlistarþróunarmiðstöðvarinnar sem er með starfsemi að Hólmaslóð 2 í Reykjavík.

Félagsmenn Félags um Tónlistarþróunarmiðstöð eru um 750 talsins og æfa þar að jafnaði 250 til 300 manns tónlist og aðrar listir, þar á meðal fimmtíu hljómsveitir.

Mikil óvissa hefur ríkt um framtíð miðstöðvarinnar vegna peningaleysis og með tónleikunum ætla tónlistarmenn að hvetja hið opinbera til að gera eitthvað róttækt í málinu. Reykjavíkurborg bjargaði nýverið rekstrinum fyrir horn um sinn með því að strika út fasteignagjöld síðasta árs upp á um þrjár milljónir. En betur má ef duga skal.

Að sögn Guðmundur Inga Þorvaldssonar leikara, tónlistarmanns og stjórnarmanns í félaginu, er Tónlistarþróunarmiðstöðin enn skilgreind sem atvinnu- og iðnaðarhúsnæði en ætti frekar að vera skilgreind sem tómstundahús. „Við höfum fengið 11,2 milljónir frá yfirvöldum síðastliðin fimm ár en þar af hafa 4,8 verið í formi endurgreiðslu á fasteignagjöldum.

Eftir standa um 135 þúsund krónur á mánuði sem við fáum til dagslegs reksturs. Þessi starfsemi er hins vegar rekin með hundruð þúsunda króna tapi á mánuði og við getum bara ekki haldið þessu áfram mikið lengur. Það verður eitthvað að gerast því við getum ekki verið að reka þetta með halla,“ segir Guðmundur Ingi.

„Þessi starfsemi er búin að sanna gildi sitt svo um munar. Ég er búinn að æfa þarna síðan húsið var opnað og það hefur ekki enn verið stolið frá mér snúru. Þarna geta ungir tónlistarmenn æft sig undir eftirliti og leiðsögn og labbað síðan tuttugu metra og haldið tónleika endurgjaldslaust,“ segir hann. „Það er mikilvægt að það sé til svona samfélag með miðlun á reynslu og forvarnargildi. Blómlegt tónlistarlíf og glæsilegar Airwaves-hátíðir eru hvorki tilviljun ein né náttúruundur heldur afrakstur ötuls starfs frumkvöðla sem eiga það skilið að á þá sé hlustað.“

Tónleikarnir verða haldnir frá klukkan 16.30 til 22 á laugardaginn. Þar verður starfsemin kynnt og félagsmenn munu stíga á svið. Á meðal þeirra verða Lay Low, My Summer as a Salvation Soldier, Benny Crespo"s Gang, I Adapt og Changer. Aðgangseyrir er enginn.