Endurskapa sögulegt vistkerfi

Velgengni samvinnuverkefnisins Wikipedia hefur alið af sér annað netfyrirbrigði sem kennt er við Wiki-skáldskap. Forlagið Penguin hefur í samvinnu við De Montfort-háskólann í Leicester stofnað til verkefnis sem þau kenna við „Milljón mörgæsir“ og er einhvers konar opin ritæfing fyrir áhugasama netverja sem vilja taka þátt í því að skrifa skáldsögu.

Sköpun sögunnar fer alfarið fram á netinu og líkt og hinn sí­stækkandi viskubrunnur Wikipediu-alfræðiritsins er öllum heimil þátttaka. Til að koma í veg fyrir hatrammar deilur og endurritunarstríð eru nemendur í ritlist við háskólann í Leicester ráðnir sem sérlegir umsjónarmenn verkefnisins auk þess sem sérstök siðaskrá er í gildi þar sem þátttakendur eru hvattir til þess að sýna hver öðrum kurteisi.

Þegar hafa átta kaflar orðið til á heimasíðunni www.amillionpenguins.com, hinn fyrsti hefst á því að persónan Stóri Tony, sem ku vera algjör skíthæll, lætur sig dreyma um sirloin-steik með frönskum kartöflum en ákveður síðan að panta pítsu. Búið er að gera grein fyrir nokkrum aðalpersónum sögunnar –- sem þó er í stöðugri endurskoðun og endursköpun enda eru lífleg skoðanaskipti á spjallrásum síðunnar þar sem heitfengir höfundarnir þrátta um eitt og annað.

Nú hefur verið skipt um suma hluta frásagnarinnar nokkuð oft en henni er líkt við sögulegt vistkerfi og verður forvitnilegt að fylgjast með hvaða gullkorn fá að halda sér í þessu frumlega ritverki og hvers konar þverskurð það veitir af stílsnilli hinna enskumælandi netnotenda.