Notalegt reggíkvöld

Reggíkvöld verður haldið á Café Kulture við Hverfisgötu í kvöld í tilefni þess að hinn 6. febrúar síðastliðinn voru 62 ár liðin síðan goðsögnin Bob Marley fæddist.

Að sögn Mark Anthony, sem stendur að kvöldinu, verður eingöngu reggítónlist spiluð og hvetur hann fólk til að kíkja inn og njóta tónlistarinnar í notalegu umhverfi. Tónlist Bobs Marley verður m.a. spiluð en á meðal vinsælustu laga hans eru I Shot the Sheriff, No Woman, No Cry, Could You Be Loved og Redemption Song.

Reggíkvöldið hefst klukkan 22 og er ókeypis inn.