Fyrsta platan á vegum Múgíbúgí

Plata með tónlist Mugison við kvikmyndina geysivinsælu Mýrina kemur í búðir á morgun. Þetta er fyrsta plata Mugison sem er gefin út hjá nýju útgáfufyrirtæki hans og föður hans, sem kallast Múgíbúgí. Platan átti upphaflega að koma út fyrir síðustu jól en einhverjar tafir urðu á útgáfunni.

„Það er oft erfitt fyrir fólk að átta sig á hvað það á að gera við „sándtrakk" sem sérstakan disk. Þegar ég gaf út Niceland held ég að fimm hafi keypt hann en síðan seldist tónlistin við A Little Trip to Heaven í um fimm þúsund eintökum. Maður veit aldrei hvernig fólk á eftir að taka kvikmyndatónlist," segir Mugison. „Ég er mjög ánægður með þennan disk að því leyti að þetta eru mest allt lög sem fólk þekkir sem ég eða fólk í kringum mig hefur útsett upp á nýtt fyrir myndina," segir hann. Mugison er jafnframt að vinna að næstu sólóplötu sinni. Hann er búinn að semja öll lögin á plötuna og á aðeins eftir að útsetja þau og taka upp. Er hún væntanleg í búðir seinna á árinu.