Veiðisögur Bubba koma út í haust

„Ekki er einu sinni kominn titill á bókina. Svo skammt er þetta á veg komið. En vinnuheitið er Veiðisögur Bubba,“ segir Egill Örn Jóhannsson, framkvæmdastjóri JPV útgáfu.

Egill Örn og hans fólk hjá JPV er þegar farið að leggja drög að næstu jólavertíð. Og nú er verið að undirbúa bók sem byggð er á veiðisögum sem Bubbi Morthens hefur safnað í sarpinn undanfarin ár. Bubbi er annálaður sögumaður og veiðisögur er eitt form frásagnarlistarinnar sem seint verður ofmetið. Sannleiksgildið er upp og ofan en Bubbi, sem hefur staðið við árbakkann árum saman og er annálaður sögumaður, styðst þó við raunverulega atburði.

Í samtali við blaðamann Fréttablaðsins segir Bubbi Morthens kappnóg komið af veiðibókum sem fjalla um hina fræðilegu hlið stangveiða. Hins vegar sé þetta brunnur sem fáir hafa leitað í. Og Bubbi segir sögu, til sýnishorns, af manni sem hann hitti á bökkum ónefndrar laxveiðiár, sem hafi verið aðframkominn af sígarettureykingum – gat vart dregið andann. Hann sagði Bubba hins vegar að sá sem hefði þraukað sem hann hefði minnstar áhyggjur af sígarettum.

Var þar þá kominn Pólverji sem hafði lifað af helförina, öll fjölskyldan hafði verið drepin í Dachau en það vildi honum til lífs að stjórnandi þar var eitthvert drengjakórafrík og lét hann syngja fyrir sig. Þegar Rússarnir komu voru Pólverjarnir reknir til Síberíu þaðan sem okkar maður strauk. Og sá þá á túndrunum lax og hafði hann til marks um frelsið sjálft. Og sór þess eið að myndi hann lifa af og efnast yrðu laxveiðar það sem hann myndi fást við.

„Magnað,“ segir Bubbi sem leitar til vinkonu sinnar Silju Aðalsteinsdóttur varðandi yfirlestur. Jafnvel mun Tolli bróðir Bubba skreyta bókina með teikningum þegar þar að kemur.