The Abbatoir Blues Tour - fjórar stjörnur

Þessi tvöfaldi DVD-mynddiskur hefur að geyma lög sem Nick Cave tók upp með hljómsveit sinni The Bad Seeds á tvennum tónleikum í London 2003 og 2004. Þeir fyrri voru haldnir til að fylgja eftir tvöföldu plötunni Abbatoir Blues/The Lyre of Orpheus en hinir síðari til að fylgja eftir Nocturama.

Fyrir aðdáendur Cave er hér um mikið hnossgæti að ræða. Báðir tónleikarnir í London eru ákaflega vel heppnaðir og fara Cave og félagar á kostum á sviðinu eins og þeirra er von og vísa. Cave líkist mest predikara þegar hann þrumar út úr sér textunum, oftast nær einn með mígrafóninn á meðan hinir spila í bakgrunninum. Lokalag fyrri disksins, Stagger Lee, er sérstaklega eftirminnilegt og fer ekki á milli mála að Cave og félagar gefa sig alla í spilamennskuna. Lýsingin á sviðinu gerir útkomuna ennþá magnaðari, þar sem skiptist á rauð og hvít ljósadýrð.

Fyrir þá sem fóru á eftirminnilega tónleika Cave í Laugardalshöll í fyrra eru DVD-diskarnir tveir jafnframt mjög góð upprifjun því flest laganna þar hljómuðu einnig í London. Má þar nefna gullmola á borð við God is in the House, Red Right Hand, Bring it On og hið áðurnefnda Stagger Lee. Í viðhafnarútgáfu fylgja jafnframt með tveir geisladiskar, um 90 mínútur alls að lengd, sem voru teknir upp á The Abbatoir Blues-tónleikaferðinni víðs vegar um Evrópu og standa þeir vel fyrir sínu.

Freyr Bjarnason