Bubbi sleginn úr hringnum

Fyrstu óvæntu úrslitin eru fyrirliggjandi í Meistaranum. Kempan Sigurður G. Tómasson útvarpsmaður – gjarnan kallaður Bubbi – var sleginn úr keppni af Birni Guðbrandi Jónssyni líffræðingi: 26 gegn 20 stigum Bubba.

Ekki að Björn Guðbrandur sé einhver kettlingur þegar spurningar og svör eru annars vegar.

En líklega kemur þetta útvarpshlustendum Sögu algerlega í opna skjöldu því þeir og fleiri vita að sjaldan eða aldrei er komið að tómum kofanum hjá Bubba þegar hina margvíslegu þætti þjóðlífsins ber á góma. En keppnin varð strax mjög jöfn. Börðust þeir Björn og Bubbi um að berja á bjölluna og höfðu svör á reiðum höndum. Björn náði þó yfirhöndinni einkum vegna ívið betri viðbragðsflýtis en í töluspurningunum náði Bubbi að snúa stöðunni sér í hag. Var þá með 25 stig gegn 21 stigi Björns. Gríðarleg spenna var þegar Björn átti eina spurning eftir, lagði fimm stig undir og hafði svarið. Björn þar með kominn einu stigi yfir en síðustu spurninguna átti Bubbi. Lagði fimm stig undir en spurningin reyndist hinum fróða Sigurði G. ofviða og því fór sem fór.

Stigatölur eru þó með því hæsta sem sést hafa í Meistaranum og ljóst að þarna voru tveir sterkir keppendur sem áttust við. Bubbi kveður því með þeim hætti að geta borið höfuðið hátt og telst eftir sem áður með fróðari mönnum.