Ný ópera í Skagafirði

Ópera Skagafjarðar var stofnuð skömmu fyrir síðustu áramót að undirlagi sópransöngkonunnar Alexöndru Chernyshovu en brátt hillir undir fyrsta verkefni þess félagsskapar. Ópera Skagafjarðar mun í samvinnu við Sinfóníuhljómsveit Norðurlands flytja óperuna „La Traviata“ í Sæluviku Skagfirðinga í lok apríl en auk þess verða tónleikar með völdum köflum úr óperunni á Egilsstöðum, Akureyri, Blönduósi og í Reykjanesbæ nú á vordögum.

Markmið þessa verkefnis er að styrkja tónlistarlíf í héraðinu en Skagfirðingar eru jú annálaðir fyrir söngmennsku sína og kórastarf. Ef vel tekst til er stefnt að því að gera þetta að árlegum viðburði, það er að setja upp eitt óperuverk á ári, eina til tvær stórar sýningar hverju sinni og aðrar minni eða eftir því hvernig áhugi verður.

Auk þrjátíu manna kórs koma sjö einsöngvarar fram ásamt fjórtján hljóðfæraleikurum. Flestir þátttakendanna eru innansveitarmenn en liðsauki berst einnig frá nálægum sýslum. Gefst með framtaki þessu einstakt tækifæri til að tengja saman starf listastofnana þar nyrðra, svo sem tónlistarskóla svæðisins, kóra, Sinfóníuhljómsveitar Norðurlands og Tónlistarfélags Skagafjarðar, og auðga með því flóru menningar og tónlistar í Skagafirði, sveitarfélaginu og almenningi til yndisauka og hagsbóta.

Alexandra Chernyshova er listrænn stjórnandi uppfærslunnar og hljómsveitarstjóri er Guðmundur Óli Gunnarsson en Jóhanna Marín Óskarsdóttir stýrir á minni tónleikunum. Einsöngvarar auk Alexöndru eru Ari Jóhann Sigurðsson, Þórhallur Bárðarson og Sigurður Skagfjörð. Leikstjóri er Guðrún Ásmundsdóttir. Sýningin fer fram sunnudaginn 29. apríl kl. 16 í íþróttahúsinu í Varmahlíð.