Fáheyrð Schubertsperla

Á tónleikum Söngsveitarinnar Fílharmóníu verður þýsk rómantík í fyrirrúmi en á vortónleikunum nú er leitað í smiðju Brahms, Mendelsohns og Schuberts.

Kórinn flytur þrjú verk á tvennum tónleikum, tvær mótettur og Messu í As-dúr eftir Schubert en það magnaða verk verður flutt í annað sinn hér á landi. Magnús Ragnarsson, stjórnandi kórsins, kveðst hafa verið á útkikki eftir spennandi og fáheyrðu verki þegar hann rakst á fyrrgreinda messu og heillaðist alveg. „Ég var mjög hissa á því hversu lítið þekkt þetta verk er en þegar ég fór að grafast fyrir um sögu þess komst ég að því að messan hafði verið flutt fyrir þrjátíu árum og þá af Fílharmoníunni. Flutningurinn tókst afar vel og verkið fékk góðar viðtökur en messan hefur ekki verið flutt síðan – sennilega vegna þess að það þarf stóra hljómsveit í verkinu og það er dýrt fyrirtæki fyrir sjálfstæðan kór.“

Messan gerir miklar kröfur til flytjendanna sem og Brahms mótettan sem einnig verður á efnisskránni. „Þessir tónleikar eru líka góð upphitun fyrir það sem koma skal,“ segir Magnús hressilega en á döfinni er flutningur á hinu vel þekkta verki Carmina Burana eftir Carl Orff, sem kórinn mun ferðast með austur til Litháen í sumar.

„Okkur var boðið að taka þátt í opnun Sumarlistahátíðar Heilags Kristófers í Vilnius,“ útskýrir Magnús. Þar mun kórinn koma fram ásamt hljómsveit og litháskum drengjakór.

Tónleikarnir verða haldnir í Langholtskirkju, þeir fyrri á morgun kl. 20 og hinir síðari á sama tíma næstkomandi þriðjudag. Einsöngvarar á tónleikunum eru Hulda Björk Garðarsdóttir, Nanna María Cortes, Jónas Guðmundsson og Alex Ashworth en konsertmeistari er Sif Tulinius.