Tónlistarkransakaka á Barnum

Uffie er 18 ára bandarísk/frönsk söngkona sem hefur verið að ná töluverðum vinsældum hér á landi og víðar á síðustu misserum. Hún verður með tónleika á Barnum á Laugavegi 22 í kvöld.

Uffie er þekkt fyrir opinskáa textagerð og afar líflega sviðsframkomu. Tónlistin sem hún spilar er einhverskonar rafmagnaður hiphop bræðingur sem er mjög hressandi.

Uffie ólst upp í Miami í Bandaríkjunum og Hong Kong. Þegar hún eltist varð hún að eigin sögn vandræðaunglingur þannig að mamma hennar sendi hana til pabba síns í Frakklandi í von um að það myndi róa hana. Það tókst ekki betur en svo að í dag er hún ekki síst þekkt fyrir afar órólega framkomu á tónleikum og texta sem fara fyrir brjóstið á mörgum. Sérstaklega þeim sem finnst að það hæfi ekki ungum stelpum að tala um dónalega hluti eins og kynlíf.

Ásamt Uffie mun koma fram hljómsveitin Steed Lord sem hefur meðal annars söngkonuna Svölu Björgvins innanborðs.

Steed Lord eru nýkomin heim úr velheppnaðri ferð á Vetrartónlistarmessuna í Miami. Þau munu svo leggja land undir fót í sumar og gera víðreist um Bandaríkin og Evrópu og munu meðal annars spila á Global Gathering tónlistarhátíðinni í Bretlandi. Bæði Uffie og Steed Lord stefna á plötuútgáfu síðar á þessu ári.

Tónleikarnir eru eins og fyrr greindi á Barnum að Laugavegi 22 og munu hefjast um klukkan 23 á leik Steed Lord. Það er frítt inn.