Elín Ósk í stórræðum

Það styttist í frumsýningu á samstarfsverkefni Íslensku óperunnar og Óperukórs Hafnarfjarðar, hinni vinsælu óperu, Cavalleria Rusticana, í Gamla bíó en æfingar eru nú á fullu og verður frumsýningin að kvöldi annars páskadags.

Um fjölmenna sýningu er að ræða því auk fimm einsöngvara taka yfir 60 manns úr Óperukór Hafnarfjarðar þátt í sýningunni ásamt yfir 40 manna hljómsveit Íslensku óperunnar. Þetta er í fyrsta sinn sem Óperukór Hafnarfjarðar ræðst í sviðsetningu en stjórnandi og stofnandi kórsins, Elín Ósk Óskarsdóttir, syngur aðalkvenhlutverkið í verkinu, hlutverk Santuzzu.

Önnur burðarhlutverk er líka í höndum þekktra söngvara: keppinauta um ástir Santuzza syngja þeir Jóhann Friðgeir Valdimarsson tenór, sem syngur hlutverk Turridos Ólafur Kjartan Sigurðarson, barítón, syngur hlutverk Alfios. Nýliðar í hópnum eru Hörn Hrafnsdóttir mezzósópran, sem fer með hlutverk Luciu, en hún hefur hlotið mikið lof fyrir frammistöðu sína í Systur Angelicu sem Óperustúdíó Íslensku óperunnar sýnir um þessar mundir, og Þórunn Stefánsdóttir sópran, syngur hlutverk Lolu. Hljómsveitarstjóri er Kurt Kopecky og leikstjóri Ingólfur Níels Árnason sem hefur einnig umsjón með sviðsmynd og búningum.

Cavalleria var sýnd í Þjóðleikhúsinu fyrir tveimur áratugum og naut þá mikilla vinsælda. Nú eru fyrirhugaðar fjórar sýningar á Cavalleria Rusticana. Hún er fyrsta óperan sem Mascagni samdi og jafnframt sú langvinsælasta. Verkið sló algjörlega í gegn þegar það var frumsýnt í Róm árið 1890 og hefur síðan þá verið sýnt reglulega um allan heim. Tónlistin úr verkinu hefur einnig verið mikið notuð í kvikmyndum og allir þekkja hið fræga Intermezzo í verkinu. Óperan er byggð á smásögu sikileyska rithöfundarins Giovanni Verga og segir frá Turiddo sem er ótrúr unnustu sinni því hann elskar enn fyrrverandi heitmey sína Lolu, sem nú er gift. Þegar Santuzza kemst að ótryggð Turiddos segir hún eiginmanni Lolu, Alfios, frá ástarsambandinu, til þess að hefna sín. Alfio skorar Turiddo á hólm og drepur hann.

Það er Elín Ósk Óskarsdóttir sem er driffjöðrin í þessu mikla fyrirtæki. Hún stofnaði Óperukór Hafnarfjarðar árið 2000 og hefur stýrt honum síðan. Félagar eru 70 talsins en kórinn sérhæfir sig í flutningi á óperu- og Vínartónlist og hefur hróður hans borist víða. Elín Ósk Óskarsdóttir hélt upp á tuttugu ára starfsafmæli sitt á síðasta ári og af því tilefni gaf hún út geisladisk þar sem hún syngur nokkrar af helstu perlum óperubókmenntanna. Hún ræðst þó ekki á garðinn þar sem hann er lægstur með því tiltæki að hrinda af stað stórri óperuuppfærslu með kórnum sínum, vinum og stórri hljómsveit.