Sígauni með sinfóníunni

Guðný Guðmundsdóttir hefur verið konsertmeistari Sinfóníuhljómsveitar Íslands í rúm þrjátíu ár. Sjálf segist hún ekki hafa tölu á þeim tónleikum þar sem hún hefur leikið einleik með sveitinni enda er hún ekkert upptekin af því að telja.

Guðný leikur einleik í tveimur verkum á tónleikum Sinfóníuhljómsveitarinnar á morgun og endurnýjar þar kynni af gömlum kunningjum. „Þetta eru hvorutveggja verk sem mér eru afar kær og hafa fylgt mér lengi,“ segir Guðný og útskýrir að verkin séu miklar andstæður og krefjist mjög ólíkra túlkana. Hið fyrra er Rómansa eftir tékkneska tónskáldið Dvorák, afar rómantískt eins og nafnið ber með sér. „Það verk er skrifað fyrir einleiksfiðlu og hljómsveit, afar ljúft og lagrænt en heilmikið drama og alvarleiki í bland,“ segir Guðný og áréttar að þar fái hljómsveitin einnig að njóta sín vel.

Hið síðara er virtúósastykki úr smiðju Maurice Ravel, verk sem flestir fiðleikarar vilja glíma við og kennt er við sígaunann. „Við vitum að sígaunar eru fantafiðlarar og það er mikil hefð í þeirra tónlist. Ravel átti það til að bregða sér í allra kvikinda líki, hann kom fyrir negrasálmum í sinfóníunum sínum og blús í fiðlusónötu. Þarna fer hann á kostum og skrifar verk líkt og fyrir sígauna. Þetta er þó ekki bara skemmtun og fjör heldur er líka að finna sorgleg blæbrigði í verkinu.“ Verkið er hratt og fjörugt undir lokin og reynir mjög á einleikarann sem þarf að munda boga sinn á ýmsa vegu sem ekki er algengt í öðrum verkum.

Guðný skellir góðlátlega upp úr þegar talið berst að þeim fjölda tónleika Sinfóníunnar þar sem hún hefur leikið einleikshlutverkin. „Ég einbeiti mér að núinu og er ekkert að telja,“ segir hún og kímir. Hún tekur fram að sér finnist það mikil gæfa að fá að hafa verið samferða sveitinni sem hefur vaxið og dafnað svo mjög. „Ég get ekki annað sagt. Það hafa auðvitað orðið miklar breytingar á hljómsveitinni frá því að ég hóf störf. Hún var nú alls ekki alslæm þegar ég byrjaði en hún hefur vaxið mikið og eiginlega sífellt meira með hverju árinu,“ segir hún að lokum.

Tónleikarnir fara fram í Háskólabíói og hefjast kl. 19.30 annað kvöld. Á efnisskránni eru auk þess forleikur eftir Rossini og íslenskur frumflutningur á fyrstu sinfóníu Rakhmanínovs. Stjórnandi á tónleikunum er hinn marglofaði Owain Arwell Hughes.