Einyrkinn sem varð að hljómsveit

Fyrsta stóra plata hljómsveitarinnar Seabear kemur út í lok apríl. Morr Music gefur plötuna svo út erlendis.

„Platan kemur út hjá bókaútgáfunni Bjarti núna í lok apríl og svo kemur hún út hjá þýska útgáfufyritækinu Morr Music í ágúst,“ segir Sindri Már Sigfússon, einn af meðlimum hljómsveitarinnar Seabear. „Hún á að heita The Ghost that Carried Us Away.“ Þetta er fyrsta stóra plata sveitarinnar en áður hefur hún gefið út stuttskífuna Singing Arc sem Sindri gaf út sjálfur.

Morr Music, sem gefur plötuna út erlendis, er þýskt tónlistarútgáfufyrirtæki sem er mjög virt í jaðartónlistarheiminum. Meðal þeirra sem gefa út hjá Morr eru Benni Hemm Hemm, Múm, Lali Puna, Ms John Soda og Isan þannig að Sea­bear er þar í góðum félagsskap.

Beðinn um að lýsa tónlistinni segir Sindri: „Bara Bruce Spring­steen hittir Bon Jovi á fylleríi í Dallas. Nei, það verður einhver annar að sjá um að lýsa henni fyrir mig.“ Forvitnum skal tjáð að tónlistinni hefur meðal annars verið lýst á þann veg að ef þú héldir lítið karnival í kjallaranum hjá ömmu þinni með dansandi kaktus og gamalli blikkandi ljósaseríu, og svo yltu allir saman niður að höfn um nóttina til að dansa og fara í stutta bátsferð, að sjálfsögðu með bæði Bruce og Bon í eftirdragi, þá væri það nokkuð nærri stemningunni í lögunum.

Seabear var upphaflega eins manns hljómsveit Sindra en hefur nú stækkað í fjögurra manna band og svo eru líka ýmsir aðrir sem koma að plötunni. Hún ber þó keim af upphafinu. „Vinnu- og upptökuferlið er ekki eins og hjá hefðbundinni hljómsveit, við hittumst ekki og djömmum lögin til heldur hittumst bara og tökum upp í litlu stúdíói sem ég er með, oftast tvö og tvö í einu.“

Seabear þykir afar skemmtilegt tónleikaband en ekki verður mikið um tónleikahald hjá hljómsveitinni til að byrja með. „Guggý býr í Hollandi þannig að það er erfitt að spila mikið á tónleikum, svo er ég líka að vinna í lokaverkefninu í Listaháskólanum.“ Sindri var einmitt staddur þar þegar blaðamaður náði tali af honum en hann stundar nám við myndlistardeild skólans. „Þó er ákveðið að það verða Morr-tónleikar í byrjun júní bæði í Reykjavík og á Akureyri. Það verðum við og Benni Hemm Hemm og svo einhverjir fleiri sem eru að gefa út hjá Morr, það er ekki alveg komið á hreint hverjir koma, bara einhverjir skemmtilegir.“