Ávaxtarkarfan verður að sinfóníu

Þorvaldur Bjarni Þorvaldsson situr nú sveittur og semur hljómsveitarverk úr tónlist Ávaxtarkörfunanar fyrir Sinfóníuhljómsveit Íslands. Áætlað er að það verði flutt 12. júní en þetta barnaleikrit Þorvalds og Kristlaugar Maríu Sigurðardóttur sló eftirminnilega í gegn þegar það var frumsýnt árið 1998. Það var síðan tekið aftur til sýningar árið 2003 og var aðsóknin engu síðri þá.

„Þetta er ótrúlega skemmtilegt efni og það er gaman að gera svona sinfónískt efni fyrir krakkana," útskýrir Þorvaldur Bjarni þegar Fréttablaðið náði tali af honum. „Söngleikurinn fjallar um liti og hvað allir eru ólíkir og ég ætla að leitast við að reyna sýna hið ótrúlega fjölbreytta litróf hljómsveitarinnar þannig að börnin átti sig betur á hlutverki hennar," bætir Þorvaldur við en þetta er ekki í fyrsta skipti sem Sinfónían og Þorvaldur taka höndum saman því hljómsveitin Todmobile hélt tónleika með sveitinni fyrir nokkrum árum þar sem lög hennar höfðu verið færð í stílinn.

Enn á eftir að semja við sögumenn og söngvara fyrir tónleikana en eftir því sem Fréttablaðið kemst næst munu þau Selma Björnsdóttir, Valgerður Guðnadóttir, Andrea Gylfadóttir, Örn Árnason og Björgvin Franz Gíslason lesa og bresta í söng þegar við á. Þorvaldur er annars að leggja lokahöndina á tónlistina fyrir kvikmyndina Astrópíu en nýlega auglýsti hann eftir lögum frá lítt þekktum hljómsveitum fyrir myndina. „Okkur hefur borist alveg heill hellingur af góðri tónlist og við ætlum að setjast niður eftir helgi til að hlusta á herlegheitin."