Silvía Nótt seld til Svíþjóðar

Hópnum sem stendur að baki Silvíu Nótt hefur borist tilboð frá sænsku sjónvarpsstöðinni TV4 en hún er stærsta einkarekna sjónvarpsstöðin þar í landi. Gaukur Úlfarsson, leikstjóri þáttanna, staðfesti þetta í samtali við Fréttablaðið og sagði þetta vissulega mikil gleðitíðindi.

Um er að ræða Eurovision-seríuna sem sýnd var á Skjá einum og segir Gaukur að þessi útrás hafi alltaf verið í spilunum. „Þættirnir voru fyrst og fremst hugsaðir fyrir útlönd,“ segir hann og viðurkennir að þetta sé mjög gott tilboð þótt ekki hafi verið tekin ákvörðun um hvort eigi að taka því. Hann segir hópinn enn ætla að bíða frá tilboði tónlistarstöðvarinnar MTV sem hafi sýnt Silvíu áhuga.

Að sögn Gauks gæti þetta haft í för með sér mikla kynningu fyrir geisladiskinn Goldmine auk þess sem sjónvarpsstöðin hyggst gefa út DVD-mynddisk með þáttunum.

Gaukur upplýsir að ef af verði fari þátturinn í loftið strax í haust. „Þetta auðveldar okkur líka framhaldið því um leið og fyrsta salan er komin í hús opnast um leið nýjar dyr,“ segir Gaukur og því virðist Silvíu Nætur-ævintýrinu hvergi nærri lokið.