Plötusamningur við 8MM

Blúsarinn Elliði Tumason, eða ET Tumason eins og hann kallar sig, hefur skrifað undir plötusamning við þýska útgáfufyrirtækið 8MM Musik, sem hefur einnig Singapore Sling á sínum snærum.

Smáskífan „ET Tumason Live at 8MM“ er væntanleg í búðir 19. júní og hefur hún að geyma átta lög, auk tveggja aukalaga, sem voru tekin upp á tónleikum á barnum 8MM, sem er í eigu sömu aðila og plötufyrirtækisins. Elliði komst í kynni við eigendur 8MM eftir að hafa stundað bar þeirra nokkuð mikið er hann bjó úti í Berlín á síðasta ári. „Ég lét þá hafa demó og svo buðu þeir mér að spila á barnum. Svo spilaði ég aftur hjá þeim og þá minntust þeir á að við gætum tekið eitthvað upp. Svo í byrjun janúar buðu þeir mér að koma í febrúar og taka upp tvenna tónleika,“ segir Elliði, sem verður 23 ára í sumar.

Elliði, sem býr núna í Kaupmannahöfn, hefur upptökur á sinni fyrstu sólóplötu á svipuðum tíma og smáskífan kemur út. „Ég er mjög ánægður. Ég hef voðalega lítið þurft að vinna fyrir þessu. Það hefur allt skriðið upp í hendurnar á mér,“ segir hann. Blús­áhugi hans er ekki nýr af nálinni. „Ég hef heyrt blús alla ævi. Pabbi á slatta af blúsplötum og á seinni árum fór ég að gramsa í þessum plötum hans og einhvern veginn ákvað ég að þetta væri tónlistin mín.“