Nýtt myndband Páls Óskars í anda Sin City

Nýtt myndband með Páli Óskari Hjálmtýssyni við lagið Allt fyrir ástina verður frumsýnt á föstudaginn og fullyrðir söngvarinn sjálfur að um „flottasta tónlistarmyndband sem gert hefur verið á Íslandi" sé að ræða. Gríðarlega mikill tími og fjármunir hafa verið lagðir í myndbandið en í því er stuðst við svokallaða „green-screen" tækni þar sem allur bakgrunnur er þrívíddarteiknaður.

„Þetta hefur verið tveggja mánaða stanslaus vinna og ég vona að árangurinn verði eftir því," segir Páll Óskar en útlit myndbandsins þykir minna nokkuð á kvikmyndina Sin City eftir Robert Rodriguez, sem markaði ákveðin tímamót í notkun slíkrar tækni.

Hannes Þór Halldórsson leikstýrir myndbandinu og þótt hann taki sjálfur ekki alveg eins djúpt í árinni og Páll Óskar segir Hannes að meiri vinna sé lögð í bakgrunninn en áður hafi þekkst hér á landi. „Það er gríðarlegur metnaður fyrir þessu verkefni og við erum að feta nýjar slóðir hér á landi hvað varðar eftirvinnslu. Grafíkin er mjög flott," segir Hannes.

Helgi Jóhannsson og Hlynur Ásgeirsson eru grafísku hönnuðurnir sem hafa umsjón yfir þrívíddarteikningunum sem notaðar eru í bakgrunni myndbandsins og hafa þeir varla litið upp frá tölvuskjánum síðustu daga, enda stuttur tími til stefnu. Gerð myndbandsins hefur staðið yfir frá því í miðjum apríl og er því gríðarlega mikið undir. „En við náum að klára þetta með sóma. Við sleppum því bara að sofa ef með þarf," sagði Helgi í samtali við Fréttablaðið.

Allt fyrir ástina er fyrsta smáskífan af væntanlegri sólóplötu Páls Óskars en hljóðblöndun á henni stendur nú yfir.

MySpace.com/palloskar