Curver endurútgefur Sjö

„Platan kom áður út fyrir tíu árum, þann sjöunda sjöunda 1997. Þetta er hugmyndafræðileg plata sem gengur alfarið út á töluna sjö og verknaðinn við að gera plötuna frekar en lögin sjálf,“ segir Curver sem endurútgefur plötuna Sjö á morgun.

Platan var tekin upp á sjö dögum árið 1997. Í 7 daga vaknaði Curver klukkan 7.00 á morgnana eftir 7 klukkutíma svefn. Til að vakna tók hann 7 armbeygjur og fór svo í 7 mínútna sturtu. Frá klukkan 7.00 til 24.00 hafði hann 17 klukkutíma til að semja og taka upp grunn að lagi á 7 hljóðrásir. Lögin eru allt að sjö mínútur á lengd en byrja á sjö mínútna fresti þannig að ef lagið er fjórar mínútur er þriggja mínútna þögn þar til næsta lag byrjar.

„Ég hafði það alltaf í huga að endurútgefa plötuna 07.07.07. Mig langaði samt til að gera þetta einhvern veginn upp á nýtt þannig að hún kemur út á DVD disk. Á disknum er stafræn endurhljóðjöfnun af plötunni, upptaka af plötuspilara að spila alla plötuna, viðtal sem Andrea Jóns tók við mig á sínum tíma í tilefni útgáfunnar, alls konar myndir og fleira dót.“

Platan kemur út í 77 númeruðum eintökum sem kosta 777 kr stykkið.