Valgeir orðaður við Mercury-verðlaunin

Valgeir Sigurðsson tónlistarmaður og upptökustjóri stýrði upptökum á plötunni We Can Create með tónlistarmanninum Maps en hún hefur verið tilnefnd til hinna virtu Mercury-tónlistarverðlauna. Alls eru tólf plötur tilnefndar en þarna er einnig að finna Arctic Monkeys, Amy Winehouse, Dizzie Rascal, Klaxons og fleiri en Valgeir hefur meðal annars unnið með Björk, Coco Rosie, Nico Muhly og Múm.

„Þetta er frábært að heyra,“ segir Valgeir sem hafði ekki heyrt af tilnefningunni er Fréttablaðið hafði samband við hann. „Við lögðum heilmikla vinnu í þetta verkefni en platan var að mestu leyti unnin síðasta sumar. Síðan var platan hljóðblönduð af Ken Thomas en þetta eru mjög sterk og spennandi lög og ég var mjög ánægður með útkomuna. Það er tiltölulega langt síðan ég lauk minni vinnslu við plötuna enda kom hún út í apríl og gaman að sjá að hún sé að fá athygli,“ sagði Valgeir en sjálfur mun hann gefa út sína fyrstu plötu 9. ágúst.

„Ég kláraði hana í vor en þetta er fyrsta sólóplatan mín og hún er gefin út af mínu eigin útgáfufyrirtæki,“ segir Valgeir en platan heitir hinu stóra nafni Ekvílibríum. Þegar hann er beðinn um að lýsa tónlistinni segir hann: „Þetta er einhvers konar blanda af akústískum og elektrónískum tónum og flest lögin eru instrúmental. Þó eru fjögur sem sungin eru af gestasöngvurum en það eru þeir Will Oldham eða „Bonnie Prince Billie“, Don MCarthy og Ástralinn J. Walker sem syngja inn á plötuna fyrir mig.“