Fyrsta tónleikaferðin í tíu ár

Tónlistarmaðurinn Jónas Sigurðsson fer í tveggja vikna tónleikaferð um Ísland hinn 28. júlí ásamt átta manna hljómsveit sem er skipuð dönskum og íslenskum tónlistarmönnum. Með í för verður danska hljómsveitin Jazirkus.

„Við erum búnir að æfa á fullu og þetta er að smella gríðarvel saman,“ segir Jónas, sem er búsettur í Danmörku þar sem hann starfar sem forritari hjá Microsoft. „Það er svolítið flókið dæmi að koma mönnum saman í svona lagað og maður gerir þetta ekki fyrir efnahagslegan ávinning. En þetta verður mjög spennandi og ég hlakka mikið til.“ Í hljómsveitinni verða meðal annars tveir trommuleikarar og blásarar og má því búast við mikilli stemningu á tónleikaferðinni.

Öðruvísi en áðurJónas gaf fyrir síðustu jól út sína fyrstu sólóplötu, Þar sem malbikið svífur mun ég dansa, sem fékk mjög góðar viðtökur gagnrýnenda. Hefur hann ekki spilað hérlendis síðan hann hélt útgáfutónleika fyrir jól og því er spenningurinn orðinn mikill að kynna plötuna betur. Þetta verður jafnframt fyrsta tónleikaferð Jónasar um landið síðan hann var í hljómsveitinni Sólstrandagæjarnir fyrir um það bil tíu árum. „Þetta verður allt öðruvísi. Það er rosalegur munur frá þeim tíma enda erum við með konur og börn og hlutirnir á allt öðrum nótum,“ segir hann. Umslagið tilbúiðJónas er þegar búinn að hanna umslagið á næstu plötu sína þrátt fyrir að lögin séu ekki næstum því tilbúin. „Ég er að vinna nýtt efni og þetta er að malla svolítið hjá mér. Ég er þegar kominn með konseptið að næstu plötu en þetta er allt saman spurning um tíma og peninga.“ Þrjú lög ókeypis Í tilefni tónleikaferðarinnar verður hægt að sækja þrjú af lögum Jónasar frítt af heimasíðunnni www.jonassigurdsson.com. Einnig verður hægt að fylgjast með túrnum á heimasíðunni.