Hita upp fyrir Eyjar

Rokkstjörnurnar Magni Ásgeirsson og hinn ástralski Toby Rand halda tónleika á Gauki á Stöng í kvöld ásamt hljómsveitinni Á móti sól. Um er að ræða nokkurs konar upphitun fyrir þjóðhátíð í Eyjum, þar sem Á móti sól ætlar að spila um verslunarmannahelgina.

Toby kemur til landsins ásamt félaga sínum úr hljómsveitinni Juke Kartel, gagngert til að upplifa þjóðhátíðarstemninguna sem Magni hefur dásamað svo mjög í hans eyru og hver veit nema þeir félagar taki lagið með Á móti sól í Eyjum.