Endurútgefa Hlemm

Hljómsveitin Sigur Rós hefur endurútgefið tónlist sína við heimildarmyndina Hlemmur eftir Ólaf Sveinsson. Plata með tónlistinni kom upphaflega út árið 2003 á vegum útgáfu sveitarinnar, Krúnk, rétt eins og í þetta sinn.

Eins og áður eru nítján ósungin lög á plötunni með rafrænu ívafi. Voru lögin tekin upp og unnin í hljóðveri sveitarinnar, Sundlauginni, árið 2002. Með endurútgáfunni fylgir bók með blýantsteikningum og vatnslitamyndum eftir meðlimi Sigur Rósar. Öll hönnun og umbrot var einnig í þeirra höndum.