Andri Snær tekur púlsinn

Andri Snær Magnason rithöfundur leiðir gesti í kvöld um sali Listasafns Íslands en þar er nú uppi sýningin Ó-náttúra. Má búast við að skáldið fari víða í hughrifum um hvað fyrir augu ber. Andri er þaulvanur greinandi og hefur farið víða í skáldskap sínum, jafnan verið á sínum sjónarhóli. Andri Snær er þekktur fyrir óvenjuleg sjónarhorn á lífið og tilveruna en segja má að sjónarhorn listamanna á sýningunni séu afar ólík því þar má sjá verk eftir 51 listamann, allt frá Kjarval til Katrínar Sigurðardóttur.

Ó-náttúra er sýning á verkum úr safneign Listasafns Íslands.

Sýningin fjallar um náttúruna í ólíkum myndum. Náttúran er gjarnan skilgreind með þrengsta móti sem hlutlægt umhverfi manna og málleysingja. Sýningin býður gestum Listasafns Íslands að endurskoða þá skilgreiningu og minnast þess að náttúran nær ekki síður til innri veruleika okkar, hvatalífs, ósjálfráðra viðbragða og hömlulausra athafna en ytri, ósnortinna aðstæðna - eða þeirra aðstæðna í landi sem við höfum rofið með einhverjum hætti, bæði fyrr og síðar. Sýningin leiðir í ljós að erfitt er að skilgreina jafn yfirgripsmikið fyrirbæri og náttúruna, eða greina hana frá því sem kalla mætti ónáttúrulegt í merkingunni gervilegt eða tilbúið.

Andri leggur af stað í göngutúrinn um Ó-náttúru kl. 21 og eru allir velkomnir.