Töfrar frá Springsteen

Nýjasta plata Bruce Springsteens, Magic, kemur út 2. október næstkomandi. Þetta verður fyrsta plata Springsteens með hljómsveitinni E Street Band í fimm ár, eða síðan The Rising kom út við mjög góðar undirtektir.

Ellefu ný lög eftir Springsteen eru á plötunni og var Brendan O"Brien upptökustjóri en hann stjórnaði einnig upptökum á The Rising. Fékk sú plata Grammy-verðlaun og seldist jafnframt ákaflega vel. „Magic er hörku rokkplata og vel spiluð af Bruce og meðlimum E Street Band,“ sagði umboðsmaður Springsteens.