Ungur ljósmyndari vekur athygli

Marino Thorlacius er ungur strákur sem var að gefa út sína fyrstu ljósmyndabók. Hann er sjálflærður í faginu og hefur einungis tekið myndir í þrjú ár. Athygli vekur að hinn virti ljósmyndari Ragnar Axelsson, eða RAX, kallar hann snilling á bókarkápunni.

„Þetta er samansafn af fyrstu verkunum mínum. Ég hef lengi gengið með það í maganum að gefa út bók og ákvað að láta bara vaða," segir Marino um bókina, Land. Nokkra athygli vekur að hinn virti ljósmyndari Ragnar Axelson, eða RAX, sem hefur starfað um árabil á Morgunblaðinu og gefið út ljósmyndabækur sjálfur, gefur bókinni lofsamlega dóma á bókarkápunni. Þar segir hann meðal annars: „Hér er á ferðinni nýr snillingur. Mér finnst myndirnar hans Marinos alveg frábærar, sennilega með því flottasta sem menn eru að gera í dag."

Marino byrjaði að taka myndir fyrir þremur árum þegar hann keypti sér myndavél. „Ljósmyndun er svo stór, hefur svo mikla möguleika. Íslendingar hafa ekki almennilega opnað augu sín fyrir því enn þá. Ljósmyndun hefur til dæmis alveg jafnmikla möguleika og málverk."

Marino segir að myndirnar séu af öllu mögulegu og unnar á misjafnan hátt. Eftirvinnsla þeirra er líka mismikil. Sumar eru mikið unnar, aðrar ekki neitt og hann vinnur þær bæði í höndunum og stafrænt.

„Það er tjáningarþörfin sem rekur mig áfram. Þetta er eins og þegar ljóðskáld gefur út ljóðabók," segir Marino um bókina sína. Hann gefur bókina út sjálfur og helmingur ágóða hennar rennur til Krabbameinsfélagsins. Sýnishorn mynda hans má sjá á heimasíðu hans, Marinot.com.