Hagnaður Landsbankans umfram væntingar

Hagnaður Landsbankans nam 40,2 milljörðum króna á síðasta ári. Þar af nam hagnaðurinn á fjórða og síðasta fjórðungi liðins árs 14,1 milljarði króna. Þetta er talsvert yfir væntingum greiningaraðila sem gerðu ráð fyrir 6,8 til 7,4 milljarða króna á tímabilinu.

Til samanburðar nam hagnaður Landsbankans 25 milljörðum króna árið 2005 og 8,8 milljörðum króna á síðasta fjórðungi ársins.

Þetta jafngildir því að hagnaður bankans eftir skatta hafi aukist um 61 prósent á milli ára.

Grunntekjur Landsbankasamstæðunnar (vaxtatekjur og þjónustutekjur) námu tæpum 70 milljörðum króna og er það 30 milljarða króna aukning á milli ára.

Tekjur af erlendri starfsemi námu 46,6 milljörðum króna eða 52 prósentum af heildartekjum Landsbankans samanborið við 10,4 milljarða krónur og 17 prósenta hlutfallið ári fyrr.

Þá var arðsemi eigin fjár eftir skatta 36,3 prósent á síðasta ári og · Arðsemi eigin fjár eftir skatta var 36,3%.

Haft er eftir þeim Sigurjóni Þ. Árnasyni og Halldóri J. Kristjánssyni, bankastjórum Landsbankans, að afkoman sé einstaklega góð og eigi velgengni bankans í Bretlandi á árinu stóran hlut að máli. Þá hafi erlendir greiningaraðilar haft áhyggjur af skammtímaaðlögun íslenska hagkerfisins og áhrifa hennar á fjármögnun og rekstur bankanna eftir mikla umræðu um íslenskt efnahagslíf í fyrra. Að hluta hafi sú umræða verið byggð á misskilningi sem hafi verið leiðréttur með öflugri upplýsingagjöf.

Uppgjör Landsbankans