Losið ykkur við krónuna og bankastjórana

Bandaríski auðkýfingurinn Steve Forbes hvetur Íslendinga til að skipta um gjaldmiðil hið fyrsta og leysa bankastjóra Seðlabankans frá störfum. Í viðtali við Fréttablaðið í dag segir Forbes að Íslendingar hafi allt að vinna með því að taka upp evru eða Bandaríkjadal þar sem hagstjórnin hérlendis virðist hvort eð er komin úr böndunum.

Forbes flytur fyrirlestur hér á landi á þriðjudagskvöldið en hann er ritstjóri viðskiptatímaritsins Forbes sem er eitt hið víðlesnasta í heimi. Hann er einnig þekktur fyrir að hafa boðið sig fram sem forsetaefni repúblikana árin 1996 og 2000.