Samfylkingin vill huga að sprotafyrirtækjum

Á blaðamannafundi í dag kynnti Samfylkingin nýja stefnumótun í atvinnumálum. Þær unnu til verðlauna á nýafstöðnu Sprotaþingi Samtaka sprotafyrirtækja og Samtaka iðnaðarins sem haldið var á föstudag. Þar greiddu fundarmenn atkvæði um tillögur stjórnmálaflokkanna og urðu tillögur Samfylkingarinnar í þremur efstu sætunum.

Samfylkingin vill að sérstaklega verði hugað að nýsköpun í atvinnulífinu og stuðningi við íslensk sprotafyrirtæki. Á meðal markmiða fyrir næstu tíu ár verður að tífalda útflutningsvirði hátæknifyrirtækja og skapa fimm þúsund ný störf í hátæknigeiranum.

Til þess að ná þessum markmiðum leggur Samfylkingin meðal annars til að fjórfalda framlag í Rannsóknar- og Tækniþróunarsjóð á næstu fjórum árum og að breyta lögum um tekju- og eignaskatt til þess að heimila skattaívilnanir vegna fjárfestinga einstaklinga í sprotafyrirtækjum.

Samfylkingin vill einnig koma á fót stoðkerfi vegna einkaleyfa og hugbúnaðarréttinda og jafnvel kanna möguleika á samstarfi við lögmannsstofur og lagadeildir háskólanna.