Eignastaða heimilanna aldrei betri

Heildarskuldir heimilanna við lánakerfið allt námu 1.325 milljörðum króna í lok síðasta árs. Þar af námu skuldir við innlánsstofnanir 708 milljónum króna. Þetta er 241 milljón meira en heimilin skulduðu við árslok árið 2005.

Þessu til viðbótar skulduðu heimilin lífeyrissjóðunum um 110 milljarða krónur, Lánasjóði íslenskra námsmanna 78 milljarða og ýmsum lánafyrirtækjum, mest til Íbúðalánasjóðs, 423 milljarða krónur.

Greiningardeild Glitnis bendir á það í Morgunkorni sínu í dag að eignir heimilanna hafi aukist mun meira á sama tíma og því hafi hrein eignastaða heimilanna batnaði. Er bent á að eignir lífeyrissjóðanna til greiðslu lífeyris sem jukust um 277 milljarða krónur í fyrra sem sé meiri aukning en á heildarskuldum heimilanna.

„Við teljum að heildareignir heimilanna hafi í lok síðastliðins árs verið um 4.000 milljarðar króna og að hrein eignastaða þeirra hafi batnað á árinu og aldrei verið betri en nú. Er hér ein skýring þess af hverju neyslustigið helst þetta hátt. Heimilin eru auk þess að þessu leiti vel í stakk búin að takast á við niðursveiflu í hagkerfinu," segir greiningardeildin og bætir því við að ráð sé gert fyrir því að draga muni úr skuldaaukningu heimilanna á næstu misserum.

„Mikil aukning ráðstöfunartekna að undanförnu, bæði í gegnum hækkun raunlauna og skattalækkun gæti þó haldið uppi áframhaldandi neyslugleði frameftir ári en einnig er hugsanlegt að almenningur muni leitast við að minnka skammtímaskuldir sínar svo sem yfirdráttarlán og kreditkortalán sem eru afar kostnaðarsöm lán," segir í Morgunkorni greiningardeildar Glitnis.