Putumayo gefur út Tómas R. Einarsson

Lög eftir Tómas R. Einarsson eru væntanlega á tveimur erlendum safndiskum á næstunni. Annars vegar á safndisk sem kólumbíski plötusnúðurinn DJ El Chino og kemur lagið af disknum Romm Tomm Tomm og er það dæmi um velheppnaða evrópska latínska tónlist. Hins vegar kemur lag eftir Tómas út á safndisk frá útgáfunni Putumayo World Music og er það af disknum Havana.

Þar verður Tómas í hópi ekki ómerkari listamanna en Tito Puente, Machito, Poncho Sanchez og Ray Barretto. Þetta er fyrsti diskurinn sem Putumayo gefur út og kynnir djass.

Í haust er væntanlegur diskur með endurhljóðblöndunum á ýmsum latínlögum Tómasar R. Meðal þeirra plötusnúða og raftónlistarmanna sem taka þátt í verkefninu eru Moonbotica, Mark Brydon (Moloko), Tom Pooks, Namito, félagar úr GusGus og Trabant, Matthías Hemstock og Hólmar Filipsson.

Tómas R. Einarsson leikur ásamt hljómsveit á opnunartónleikum tónlistarhátíðarinnar Vorblót, fimmtudaginn 17. maí á NASA við Austurvöll. Húsið opnar klukkan 20:00 og tónleikarnir hefjast klukkan 21:00. Auk Tómasar kemur söngkonan Oumou Sangaré fram ásamt hljómsveit sinni. Miðaverð á tónleikana er 3.500 krónur. Miðasala fer fram í verslunum Skífunnar og á Midi.is.