FL Group tekur 28 milljarða lán

FL Group undirritaði í dag 330 milljóna evra lánssamning til þriggja ára við bandaríska fjárfestingabankann Morgan Stanley. Þetta jafngildir 28 milljörðum króna og er fjármögnun vegna kaupa á hlutafé í Glitni.

Í tilkynningu frá FL Group segir að félagið hafi fjármagnað með langtímalánum alla hlutafjáreign sína í bankanum, sem er stærsta eign félagsins.

Haft er eftir Hannesi Smárasyni, forstjóra FL Group, að fjármögnunin auki sveigjanleika FL Group til fjárfestinga til muna og styrki lausafjárstöðu félagsins.