Pavarotti laus af sjúkrahúsi

Stórtenórinn Luciano Pavarotti hefur fengið leyfi lækna til að yfirgefa sjúkrahúsið á Norður-Ítalíu sem hann var lagður inná með háan hita og lungnabólgu á dögunum.

Samkvæmt talsmanni Pavarotti er söngvarinn sæll og glaður og hlakkar til að halda aftur til starfa sinna sem söngkennari.

Líklega yfirgefur hann sjúkrahúsið á allra næstu dögum.

Pavarotti stefnir á að halda í hljóðver í næsta mánuði og taka upp hljómskífu.

Pavarotti greindist með krabbamein í briskirtli í júlí á síðasta ári og þurfti í kjölfarið að fresta fyrirhugaðri kveðjutónleikaferð sinni. Hann hefur ekki sést opinberlega síðan.