Úrvalsvísitalan féll undir 7.000 stigin

Úrvalsvísitalan hefur lækkað um 3,63 prósent í Kauphöllinni í dag. Hún stendur í 6.955 stigum og hefur ekki verið jafn lág síðan seint í janúar. Gengi fjármálafyrirtækja hefur hríðfallið það sem af er dags, mest í Straumi og Exista en gengi beggja hefur fallið um rúm fimm prósent. Gengi Straums hefur ekki verið lægra síðan í ágúst á síðasta ári.

Markaðsverðmæti fjögurra fyrirtækja hefur aukist á sama tíma, mest í Atlantic Petroleum sem hefur hækkað um tæp fimmtán prósent. Gengi félagsins féll hins vegar um þrjátíu prósent í síðustu viku.

Fall Úrvalsvísitölunnar er talsvert meira en sem nemur lækkun á alþjóðlegum hlutabréfamörkuðum í dag en hlutabréfavísitölur víða um heim hafa staðið á rauðu.