Hraðskreiðar skutlur

„Við höfum verið með gott úrval og gott verð á rafskutlum en þær eru frá 99.000 krónum upp í um 200.000 krónur. Þær öflugustu komast allt upp í 30 kílómetra á klukkustund og fara auðveldlega upp brekkur,“ segir Halldór Berg Jónsson, eigandi fyrirtækisins til tveggja ára. Rafskutlur eru öruggur ferðamáti og hafa reynst fólki sem á erfitt með að hreyfa sig vel.

Þær veita aukið frelsi þar sem þeir sem þær nota fá fleiri tækifæri til að hreyfa sig og komast um. „Það eru sjálfvirkar bremsur á þessu, hraðastýringar og annað og það er mjög auðvelt að stjórna tækinu,“ útskýrir Halldór sannfærandi.

Hægt er að fá styrk frá Tryggingastofnun til að festa kaup á rafskutlu en skilyrði er þó að hafa læknisvottorð. „Fólk sem getur ekki gengið á möguleika á því að Tryggingastofnun greiði rafskutluna að fullu eða að hluta,“ segir Halldór. Í boði eru ýmsir litir og búnaður. „Við erum með marga liti, allt frá bláum og gráum upp í bleikan og rauðan. Síðan fylgja stafahaldarar og körfur með skutlunum. Ódýrasta skutlan er til að nota innanhúss en hinar er hægt að nota úti og fara lengri vegalengdir. Þær sem eru nú á um 150.000 krónur eru ætlaðar á sléttlendi en nú er gengið svo óhagstætt þannig að verðið gæti hækkað í næstu sendingu. Við vorum að selja rafskutlurnar þrisvar sinnum ódýrari en samkeppnisaðilarnir,“ útskýrir Halldór en það eru þrír aðilar sem flytja inn rafskutlur.

Margir kaupa varadekk með skutlunum ef ske kynni að það myndi springa en vetrardekk eru ekki í boði. „Það er ekki gott að nota skutlurnar í snjó þar sem þær eru ekki nógu öflugar. Þær henta þó vel innanhúss og úti í góðu veðri.“hrefna@frettabladid.is