Neðanjarðarrapp á Organ

Triangle Productions munstanda fyrir tónleikum á Organ í kvöld. Tónlistarmaðurinn Josh Martinez mun koma fram en hann er einn virtasti neðanjarðarrappari heimsins í dag og fékk plata hans Buck up Princess verðlaun fyrir bestu hiphop-plötu ársins í föðurlandi hans Kanada árið 2004.

Írski plötusnúðurinn DJ Flip mun einnig þeyta skífum fyrir tónleikagesti. DJ Flip er fyrrverandi heimsmeistari í skífuþeytingum og er hér á landi að spila í þriðja sinn. Íslensku tónlistarmennirnir Introbeats, Arkir og Mælginn koma einnig fram í kvöld ásamt Josh Martinez og DJ Flip.

Triangle Productions er plötufyrirtæki í eigu listamannanna Rain og Beatmakin Troopa og hefur fyrirtækið staðið fyrir ýmsum tónleikum síðastliðið ár. Aðgangseyrir er 1.500 krónur og hefjast tónleikarnir klukkan 21.00. - sm