VBS úr plús í mínus

VBS fjárfestingarbanki tapaði 870 milljónum króna á fyrstu sex mánuðum ársins samanborið við 1,1 milljarða króna hagnað á sama tíma í fyrra.

Í tilkynningu frá bankanum segir að þótt niðurstaðan hafi verið neikvæð síni afraksturinn að grunnstarfsemi sé góð.

Vöxtur er á efnahagsliðum bankans og er niðurstöðutala efnahagsreiknings 55,7 milljarðar króna. Þóknunartekjur nema 447 milljónum króna og hreinar vaxtatekjur 334 milljónum króna. Þá er eigið fé samkvæmt árhlutareikningi um 7,1 milljarður og eiginfjárhlutfall (CAD) 16,9 prósent.

Í uppgjörinu kemur fram að bankinn nýtti sér sterka eiginfjárstöðu og færði varúðarfærslu sem nam 765 milljónum króna vegna mögulegrar virðisrýrnumar útlána. Einnig voru óskráðar eignir færðar niður um tæplega 400 milljónir króna.

Jón Þórisson, forstjóri VBS, segir ánægjuleg að sjá þekkingu og reynslu starfsmanna hafa tryggt tekjustraum bankans þrátt fyrir öflugan mótvind á mörkuðum, ekki síst fasteignamarkaði. „Með því vitum við að hæfileikinn til viðhalda traustum tekjum bankans er til staðar, sem er mjög mikilvægt. Við gerð uppgjörsins var lögð rík áhersla á að vanmeta ekki það tjón sem aðstæðurnar geta valdið bankanum, svo sem við mat á virðisrýrnun útlána og mat á virði hlutabréfa í eigu hans. Ljóst er að ytri aðstæður verða áfram nokkuð mótdrægar en gerum ráð fyrir að það versta sé að baki. Það er því full ástæða til bjartsýni á framhaldið," segir hann.