Bera saman bækur sínar

Langstærsta bókaútgáfa landsins er Forlagið og þar eru menn nú að koma sér í stellingar fyrir jólabókaflóðið, sem er þegar hafið, með sérlegu bókakaffi og jólaboði.

„Þetta hefur lukkast alveg einstaklega vel. Markmiðið er að auka samskipti við höfunda. Skapa vettvang til að hitta höfunda og það hefur verið góð mæting frá upphafi,“ segir Egill Örn Jóhannsson, framkvæmdastjóri Forlagsins.

Alltaf síðdegis á fimmtudögum hópast landsþekktir rithöfundar í höfundakaffi sem þeir Forlagsmenn boða til. Þessi siður hefur verið við lýði allt frá því síðsumars og er þegar að taka á sig mynd hefðar. Þarna bera menn saman bækur sínar í orðsins fyllstu merkingu. Og háfleygar umræður eiga sér stað. Fyrir viku var svo jólaboð Forlagsins, sem þegar er orðinn fastur liður í samkvæmislífi þeirra sem tengjast bókabransanum með einum eða öðrum hætti. Aðspurður hvort þá sé blaðamönnum og gagnrýnendum sérstaklega boðið með það fyrir augum að múta með rauðvíni og kræsingum – fá betra veður, segir Egill Örn: „Nei, ég kannast ekki við það.“jakob@frettabladid.is