Frægir gítarleikarar á djasshátíð

Japanski gítarleikarinn Kazumi Watanabe og hinn belgíski Philip Catherine koma fram á gítarveislu Jazzhátíðar í Háskólabíói annað kvöld, 28. ágúst. Watanabe er afar hátt skrifaður bæði í heimalandi sínu og í hinum alþjóðlega gítarheimi. Hefur hann verið kostinn besti djassleikari ársins í 24 ár samfleytt í japanska tímaritinu Swing Journal. Catherine, sem hefur áður heimsótt Ísland, hefur verið í fremstu röð gítarleikara heims um árabil.

Magnús Eiríksson og Þórður Árnason mæta einnig til leiks í gítarveislunni, þar sem Björn Thoroddsen verður gestgjafi. Björn er þessa dagana að ganga frá þriggja diska samningi við útgáfufyrirtæki í Mexíkó með íslensk/dönsku hljómsveit sína Svare/Thoroddsen, auk þess sem hann spilaði nýlega í Kanada við góðar undirtektir.

Í tilefni gítarveislunnar í Háskólabíói ætla Jazzhátíð og Tónastöðin að efna til happdrættis meðal tónleikagesta og hlýtur heppinn áheyrandi nýjan gítar í verðlaun, en dregið verður úr seldum miðum á tónleikunum.