Fagna plötu

Útgáfu plötunnar Jawbreaker með Tommygun Preachers verður fagnað á Organ í kvöld. „Það verður örugglega þrusustemming. Fólk er að hita upp fyrir verslunarmannahelgina og auðvitað afmælishátíð Organ. Við erum loksins að koma aftur og ryðjast inn í bæinn, en við erum búnir að vera að spila mikið í Keflavík," segir Smári, gítarleikari Tommygun Preachers.

Hljómsveitin tekur sér annars frí yfir helgina. Hann segir plötuna, sem kom út fyrir nokkrum vikum, hafa gengið vel. „Við höfum reyndar ekki fengið neinar tölur, en þetta gengur bara eins og venjuleg íslensk plata held ég." Hljómsveitin Dys sér um upphitun. Tónleikarnir hefjast klukkan níu og kostar 500 krónur inn. - kbs