Norrænir leikhúsdagar

Meðan á hátíðinni í Tampere stendur er haldið upp á Norræna leikhúsdaga og er það ánægjulegt tækifæri til að sameina þessar tvær hátíðir. Verður því talsvert meira af norrænu leikhúsfólki í Tampere.

Á Norrænum leikhúsdögum verða Leikskáldaverðlaun Norðurlanda afhent í níunda sinn. Annað hvert ár eru valin áhugaverðustu frumsömdu verkin í hverju landi frá árunum á undan, þau sett undir alþjóðlega mælistiku og eitt verðlaunað. Verkin sem nú eru tilnefnd eru Om et øjeblik eftir Peter Asmussen frá Danmörku, Fundamentalist eftir Juha Jokela frá Finnlandi sem flutt verður á hátíðinni af færeyskum leikhóp, Óhapp Bjarna Jónssonar, og Valerie Jean Solanas ska bli president i Amerika eftir Sara Stridsberg frá Svíþjóð.

Verðlaunin voru veitt í fyrsta sinn 1992 á Norrænum leikhúsdögum í Reykjavík og fékk Hrafnhildur Hagalín þá verðlaunin fyrir Ég er meistarinn. Aðrir norrænir höfundar sem þegið hafa þennan heiður fyir verk sín eru Kari Hotakainen, Astrid Saalbach, Jóanes Nielsen, Jon Fosse, Lars Norén, Paavo Haavikko og Svend Holm. Ekkert verðlaunaverka þeirra hefur komið á svið hér á landi.

Norrænir leikhúsdaga eru nú haldnir á sjötugs afmæli norræns leikhússamstarfs. Hátíðin nýtur styrkja Norrænu ráðherranefndarinnar. Öll tilnefndu verkin eru leiklesin á hátíðinni nema færeyska framlagið. Tilgangur daganna er að efla samskipti milli norrænna leikflokka og leikhúsfólks. Að auki er boðið uppá námskeið, kynningar og umræður auk alls þess fjölda leiksýninga sem má skoða á hátíðinni. Sökum þess að dagskrána sækja margir alþjóðlegir gestir er opinbert tungumál hátíðarinnar enska.

Margt er forvitnilegt á dagskrá þessa daga og kemur íslenskt leikhúsfólk að þeirri vinnu: umræður um sjálfsmynd og menningu í norrænu leikhúsi; þemu í rússneskri, baltneskri og bandarískri leikritun og einnig í norrænni leikritun þar sem Hlín Agnarsdóttir verður á palli. Í ljósi reynslu munu menn ræða hvers vegna norræn leikrit eru læst innan landamæra þjóðanna. Hávar Sigurjónsson verður á palli að stýra umræðum um höfundasmiðjur og nýjar leiðir í sköpun leikverka. Ragnheiður Skúladóttir leiðir umræður um hlutverk gagnrýnenda í nýju fjölmiðlaumhverfi. Egill Heiðar Anton Pálsson ræðir í hóp um bann­svið og ritskoðun í leikhúsi.

-pbb