Leyfið bönkunum að koma til mín

Leyfið bönkunum að koma til mín og bannið þeim það ekki! Að vandlega athuguðu máli og hafandi ráðgast við fjölskyldu mína hef ég ákveðið að bjóðast til að losa þjóðina á einu bretti við vandamálið sem hangir yfir okkur öllum. Bankavandamálið. Vaxtavandamálið. Seðlabankavandamálið. Allir bankar sem erfiði og þunga eru hlaðnir geta komið til mín og ég mun kaupa þá og staðgreiða og eigendur þeirra geta gengið til móts við nýja tíma glaðir og áhyggjulausir. Staðgreiðsluverð fyrir stykkið getur numið allt að einni evru, sem er stabíll og góður gjaldmiðll og ekki síðri en íslenska krónan.

ÉG LÝSI MIG hér með reiðubúinn að kaupa alla íslensku bankana, jafnvel Seðlabankann líka þrátt fyrir að ástandið á þeim bæ sé eins og allir vita. Fyrir hvern banka er ég reiðubúinn að greiða út í hönd allt að eina evru. Í kaupunum fylgja allar skuldir bankanna sem löglega er til stofnað og allar eignir þeirra, þar með talin leynihólf, leynireikningar hérlendis og erlendis, listaverkasöfn, hlutabréfasöfn og annað fé fast og laust.

ÞAR SEM ég hef ekki áhuga á að sóa nema sem allra minnstum hluta af lífi mínu sem kapítalisti er fyrirætlun mín sú að gefa íslensku þjóðinni aftur það sem var með rangindum, svindli, refskap og pólitískri spillingu frá henni tekið. Af fyrri reynslu treysti ég ekki stjórnmálamönnum til að sjá um að einkavæða bankana að nýju og því ætla ég sjálfur að sjá um einkavæðinguna. Það ætla ég að gera með því að senda hverju mannsbarni sem á lögheimili sitt á Íslandi eitt hlutabréf í hverjum banka og verða hlutirnir jafnmargir og íbúatala landsins gefur tilefni til.

ÞETTA TILBOÐ stendur til miðnættis í nótt. Þeir bankar sem ekki taka þessu tilboði skulu ekki voga sér að fara fram á að skattpeningar mínir verði nýttir til að bjarga þeim úr þeim ógöngum sem „alþjóðlegur skortur á lánsfjármagni" hefur leitt þá í - ekki „græðgi og skeytingarleysi um almannaheill" eins og margir halda. Seðlabankanum ætla ég að pakka saman í vasatölvu sem pípir þegar breyta þarf vöxtunum. Svörtuloftum verður breytt í rannsóknarstofnun fyrir stórmennskubrjálæði.